ကိုဗစ် 19 နဲ့ ဗီတာမင်ဒီ

  

ကိုဗစ် 19 နဲ့ ဗီတာမင်ဒီ

၁။ ဗီတာမင်ဒီက ကိုဗစ်ကူးစက်မခံရအောင်အကာကွယ်ပေးသလား။

သုတေသနအထောက်အထားမရှိသေးပါ။

 

၂။ ဗီတာမင်ဒီဖြည့်စွက်သောက်ခြင်းက ကိုဗစ်ရောဂါကူးစက်ခံရလျင် ရောဂါမပြင်းထန်အောင်၊ အသက်မသေအောင် အထောက်အကူဖြစ်သလား

အဲလိုအကျိုးရှိတယ်ဆိုတဲ့ခိုင်လုံတဲ့ အထောက်အထားမရှိသေးပါ။

 

၃။ ကိုဗစ်ကူးစက်ခံရသူ ဗီတာမင်ဒီသောက်သင့်သလား?

လူအများစုမှာ ဗီတာမင်ဒီချို့တဲ့မှုရှိနေနိုင်ပြီး ဗီတာမင်ဒီချို့တဲ့မှုက ကိုယ်ခံအားစနစ်ကို ထိခိုက်နိုင်လို့ ကိုဗစ် ကူးစက်ခံရသူတွေမှာ တနေ့ ဗီတာမင်ဒီ ၂၀၀၀ ယူနစ် သောက်သုံးစေခြင်းက ဘေးမဖြစ်နိုင်ဘဲ အကျိုးရှိကောင်းရှိနိုင်တယ်လို့ ဆရာဝန်အများစုက ယူဆကြပါတယ်။

 

၄။ ဗီဝာာမင်ဒီက ကိုဗစ်ကို ခုခံဖို့ဘာတွေအထောက်အကူဖြစ်နိုင်ပါသလဲ။

ဗီတာမင်ဒီကကိုယ်ခံအားစနစ်မှာ အရေးကြီးတဲ့ T ဆဲလ်တွေများလာဖို့နဲ့ အဲဒီဆဲတွေအလုပ်လုပ်ဖို့ အထောက်အကူဖြစ်တယ်ဆိုပါတယ်။

ကိုဗစ်ရောဂါသည်တွေမှာ ဗီတာမင်ဒီနဲ့ တိုက်ရိုက်ဆက်စပ်မှုသုတေသနတွေမရှိသေးပေမယ့် ဗီတာမင်ဒီဖြည့်စွက်ပေးခြင်းက တခြားအသက်ရှူလမ်းကြောင်း ကူးစက်ရောဂါသည်တွေကနေ အကာကွယ်ပေးနိုင်တယ်။ ဗီတာမင် စီ၊ ဒီနဲ့ ဘီဝမ်း တွေတွဲပေးခြင်းဖြင့် ကိုဗစ်နဲ့ အလားတူတဲ့ ပြင်းထန်တဲ့ အသက်ရှူလမ်းကြောင်း ရောဂါ၊ သွေးဆိပ်တက်ခြင်းတွေကနေကာကွယ်ပေးတယ်လို့ဆိုပါတယ်။

တဖန် ဗီတာမင်ဒီချို့တဲ့သူတွေမှာ ကိုယ်ခံအားစနစ်မှာချို့ယွင်းချက်ဖြစ်လို့ ဗိုင်းရပ်ပိုးကူးစက်မှုဒဏ်ကို ပိုခံရပြီး  cytokine storm လို့ခေါ်တဲ့ ကိုဗစ်ကြောင့် ကိုယ်ခံအားစနစ်က အဆုတ်ထဲမှာဒုက္ခပေးတဲ့ပြသနာကို လည်းပိုများစေတယ်လို့ဆိုပါတယ်။

ဆက်စပ်လို့ရတဲ့  သွယ်ဝိုက်သောအထောက်အထားများ

အမေရိကားနဲ့ ဥရောပမှာ လူမည်းတွေ၊ စပိန်လူမျိုးအနွယ်တွေ၊ အသက်ကြီးသူ၊ အဝလွန်သူနဲ့ သွေးတိုးရောဂါရှိသူတွေမှာ ကိုဗစ်ရောဂါ ပိုပြီးပြင်းပြင်းထန်ထန် ခံစားရ၊ ပိုမိုသေဆုံးကြတာကိုတွေ့ရှိရပါတယ်။

အဲဒီသူတွေဟာ ဗီတာမင်ဒီ ချို့တဲ့ ဖို့ အခွင့်လမ်းများတဲ့သူတွေလည်းဖြစ်တဲ့အတွက် ဗီတာမင်ဒီချို့တဲ့လို့ သူတို့တွေ ပိုမိုပြင်းထန်တဲ့ ရောဂါလက္ခဏာကိုခံစားရ၊ သေဆုံးကြတာဖြစ်နိုင်တယ်လို့ ကောက်ချက်ဆွဲပါတယ်၊

နောက်တခါ ကိုဗစ်ကူးစက်သေဆုံးမှုများတဲ့နိုင်ငံတွေနယ်တွေ ဗီတာမင်ဒီချို့တဲ့သူများတဲ့ နေရာတွေဖြစ်နေတာကိုလည်းတွေ့ရလို့ ဆက်စပ်မှုရှိနိုင်တယ်လို့ကောက်ချက်ဆွဲပါတယ်၊

အဲဒီလိုကောက်ချက်က ကိုဗစ်ဒဏ်ကို ပိုပြီးပြင်းပြင်းထန်ထန်ခံစားရသူတွေ သေဆုံးသူတွေရဲ့ သွေးထဲက ဗီတာမင်ဒီကိုတိုင်းပြီး ချို့တဲ့မှုရှိမရှိ နဲ့ ရောဂါဒဏ်မခံရသူတွေ သက်သာသူတွေရဲ့ သွေးထဲကဗီတာမင်ဒီကို တိုင်တာပြီး နှိုင်းယှည် ဆက်စပ်ကြည့်တာလိုတော့ ခိုင်လုံမှုမရှိလှပါ၊

ဘယ်လိုပဲဖြစ်ဖြစ် ကိုဗစ်ကူးစက်ခံနေရသူတွေကတော့ တနေ့ကို ဗီတာမင်ဒီ ယူနစ် ၂၀၀၀ သောက်သုံးခြင်းက ဘေးဥပါဒ်မပေးနိုင်လို့ မိမိမှာ မသိဘဲ ဗီတာမင်ဒီချို့တဲ့ နေခဲ့သည်ရှိသော် အဲလိုချို့တဲ့မှုကြောင့်ဖြစ်နိုင်တဲ့ ပြသနာတွေကို ကာကွယ်ပေးနိုင်လို့ စိတ်ချလက်ချသောက်နိုင်ပါတယ်။

နာလံထပြီးသွားလျင်တော့ လူတယောက်နေ့စဉ်လိုအပ်ချက် ဇယားထဲကအတိုင်းသောက်သုံးခြင်းက ပိုပြီးသင့်တော်ပါတယ်၊

တနေ့တာ ဗီတာမင်ဒီ လိုအပ်ချက်  ( အမေရိကန်အမျိူသားကျန်းမာရေး ဌာနမှထုတ်ပြန်ချက်) https://ods.od.nih.gov/factsheets/VitaminD-Consumer/

အသက်အရွယ်	Recommended Amount			လိုအပ်သည့်ဗီတာမင်ဒီပမာဏ
အသက် တနှစ်အောက်	10 mcg (400 IU)			= ယူနစ် ၄၀၀
အသက် တနှစ်မှ ၁၃ နှစ်	15 mcg (600 IU)			= ယူနစ် ၆၀၀
အသက် ၁၄ နှစ်မှ ၁၈ နှစ်	15 mcg (600 IU)			= ယူနစ် ၆၀၀
အသက် ၁၈ နှစ်မှ ၇၀	15 mcg (600 IU)			= ယူနစ် ၆၀၀
အသက် ၇၁ နှစ်အထက်	20 mcg (800 IU)			= ယူနစ် ၈၀၀
ကိုယ်ဝန်ဆောင်နှင့် နို့တိုက်မိခင်များ	15 mcg (600 IU)			= ယူနစ် ၆၀၀

အစာခြေအားမကောင်းသူ ၊ အူ၊ အသည်းမကောင်းသူတွေကတော့  နည်းနည်းပိုသောက်သင့်ပေမယ့် တနေ့ကို ယူနစ် ၄၀၀၀ ( လူကောင်သေးလျင် ယူနစ် ၃၀၀၀ ) ထက်တော့ ပိုမသောက်သင့်ပါ။

ဒေါက်တာအောင်

၀၉-၁၂-၂၀၂၀  

https://b-wise-2b-healthy.blogspot.com/2020/12/19.html

ကိုးကား

https://www.ncbi.nlm.nih.gov/pmc/articles/PMC7513835/

https://www.bmj.com/content/356/bmj.i6583

https://www.covid19treatmentguidelines.nih.gov/adjunctive-therapy/vitamin-d/

ဗီတာမင်ဒီဆေးတောင့် သောက်သင့်သလား

 ဗီတာမင်ဒီဆေးတောင့် သောက်သင့်သလား

ပြီးခဲ့သော နှစ်များအတွင်း မြန်မာပြည်မျာ ဗီတာမင်နဲ့ ဖြည့်စွက်စာ စားသုံးမှုတွေခေတ်စားလာပါတယ်.

ဆိုရှယ်မီဒီယာနဲ့ တချို့ ဆရာဝန်ဆိုသူတွေရဲ့ ဟောပြောမှုတွေကြောင့်လည်း မလိုအပ်ဘဲ ဖြည့်စွက်စာမျိုးစုံကို အလွန်ကျွံသုံးစွဲနေကြတာတွေစိုးရိမ်စရာကောင်းလောက်အောင်များလာတာကိုတွေ့ရပါတယ်။

တကယ်တော့ လူတဦးနဲ့တဦး လူနေမှုပုံစံနဲ့ အစားစာ မတူတာကြောင့် ဖြည့်စွက်စာ လိုအပ်ပုံမတူလို့ တချို့လူတွေမှာဖြည့်စွက်စာကြောင့် ဘေးဥပါဒ်ဖြစ်ရပါတယ်။

လူအတော်များများမှာ တကယ် အကျိုးရှိမရှိ အထောက်အထားမခိုင်လုံတဲ့ ဖြည့်စွက်စာတွေကြောင့် ငွေကုန်ကြေးကျများတာရှိသလို၊ ယုံကြည့်မှုအစွန်းရောက်ကာ၊ ခိုင်လုံတဲ့ အထောက်အထားရှိတဲ့ လမ်းညွှန်မှုတွေ ဆေးတွေကိုစွန့်ပယ်ပြီး ဖြည့်စွက်စာတွေကိုသ အဓိကထားစားသုံးလို့ ရောဂါကျွမ်းပြီးမှ ဆေးပြန်ကုကြတာတွေလည်း တွေ့နေရပါတယ်။

ပြောင်းလဲလာတဲ့ မြို့ပြလူနေမှူစနစ်ကြောင့် ကမ္ဘာတလွှားမှာ ဗီတာမင်ဒီ ချို့တဲ့မှုတွေများလာချိန်၊ မြန်မာပြည်မှာ လည်း ဖြည့်စွက်စာတွေအလွန်ခေတ်စားနေပြီး ဗီတာမင်ဒီက ကင်ဆာကိုတောင်ကာကွယ်တယ်ဆိုပြီး လိုသည်ထက်ပိုသောက်နေကြတာ အတော်ကြီးကိုများလာနေပါတယ်။

ဗီတာမင်ဒီနဲ့ပတ်သက်ပြီး မြန်မာနိုင်ငံ ကျန်းမာရေးဌာနကထုတ်ပြန်ထားတာကို ဒီမှာ တင်ပြထားပါတယ်။

ကျန်းမာရေးဝန်ကြီးဌာနမှ ထုတ်ပြန်ထားသော ဗီတာမင်ဒီအကြောင်း (၁) 

 

ကျန်းမာရေးဝန်ကြီးဌာနမှ ထုတ်ပြန်ထားသော ဗီတာမင်ဒီအကြောင်း (၂) 

စာမရှည်အောင်  ဒီပို့စ်မှာ အဓိကအချက်တွေကိုပဲ ရေးမှာဖြစ်ပါတယ်။

၁။ ဗီတာမင်ဒီကိုဘယ်လိုရမလဲ

(က) လူအများစုအတွက် လိုအပ်တဲ့ ဗီတာမင်ဒီ ၉၀ ရာနှုန်းကိုနေရောင်ခြည်ကနေရပါတယ်။

 မျက်နှာနှင့် လက်ဖျံများကို တနေ့ ၁၀ မိနစ်မှ မိနစ် ၂၀ နေရောင်တိုက်ရိုက်ထိလျင် တနေ့တာလုံလောက်တဲ့ ဗီတာမင်ဒီကိုထုတ်လုပ်နိုင်ပါတယ်။ 

ဒါကြောင့် နေရောင်ထဲမှာအလုပ်လုပ်သူနဲ့ နေပူထဲလမ်းများများလျှောက်ရသူတွေ ဗီတာမင်ဒီဆေးတွေသောက်ဖို့မလိုပါ။

အိမ်ပြင်ထွက်ခဲသူနဲ့ ထွက်သော်လည်းနေရောင်ကိုလုံလောက်အောင်ထိတွေ့မှုမရှိသူ၊ နေရောင်နှင့် ထိတွေ့သော်လည်း sunscreen နေရောင်ကာ  လူးဆေးလူးသူများကတော့ ဗီတာမင်ဒီကို အရေပြားကနေရတာ မလုံလောက်နိုင်လို့ အစားအသောက်နဲ့  ဖြည့်စွက်စာကနေပဲရနိုင်ပါတယ်။

တခါ နေရောင်ခြည်နဲ့တိုက်ရိုက်ထိတွေ့မှု သိပ်များသူများမှာ ဗီတာမင်ဒီကိုတော့ လုံလောက်အောင်ရပေမယ့်  အရေးပြားကင်ဆာဖြစ်နိုင်ခြေပိုများပါတယ်။

မှန်ကိုဖြတ်လာတဲ့နေရောင်ကတော့ ဗီတာမင်ဒီထုတ်ဖို့မကူညီနိုင်ပါ။

(ခ) တခြားနည်းတွေကတော့ ဗီတာမင်ဒီများပါတဲ့ အစားအစာ ( ငါးကြီးဆီ၊ ငါးကြီးအသည်းဆီ၊ တိရိစ္ဆာန်အသည်း၊ ကြက်ဥ၊ ထောပတ်၊ ဆယ်လမွန်ငါး၊ငါးသေတ္တာငါး (ဆာဒင်း၊ တူနာ)မှို အစို၊ မှိုအခြောက် ) နဲ့ 

(ဂ) ဖြည့်စွက်စာတွေကနေရပါတယ်။

(ဃ) တချို့နိုင်ငံတွေမှာတော့ ဗီတာမင်ဒီဖြည့်စွက်ထားတဲ့နို့တို့ အစားအသောက်တို့ရှိပါတယ်။ 

 

၂။ တနေ့တာ ဗီတာမင်ဒီ လိုအပ်ချက်  ( အမေရိကန်အမျိူသားကျန်းမာရေး ဌာနမှထုတ်ပြန်ချက်) https://ods.od.nih.gov/factsheets/VitaminD-Consumer/

အသက်အရွယ်	Recommended Amount			လိုအပ်သည့်ဗီတာမင်ဒီပမာဏ
အသက် တနှစ်အောက်	10 mcg (400 IU)			= ယူနစ် ၄၀၀
အသက် တနှစ်မှ ၁၃ နှစ်	15 mcg (600 IU)			= ယူနစ် ၆၀၀
အသက် ၁၄ နှစ်မှ ၁၈ နှစ်	15 mcg (600 IU)			= ယူနစ် ၆၀၀
အသက် ၁၈ နှစ်မှ ၇၀	15 mcg (600 IU)			= ယူနစ် ၆၀၀
အသက် ၇၁ နှစ်အထက်	20 mcg (800 IU)			= ယူနစ် ၈၀၀
ကိုယ်ဝန်ဆောင်နှင့် နို့တိုက်မိခင်များ	15 mcg (600 IU)			= ယူနစ် ၆၀၀

 

 

၃။ ဗီတာမင်ဒီကိုဘာလို့လိုအပ်တာလဲ၊ ဘာတွေအသုံးတည့်သလဲ

 ဗီတာမင် ဒီကအရိုးများမာဖို့ မရှိမဖြစ်လို့အပ်လို့ ဗီတာမင်ဒီချို့တဲ့လျင် အရိုးများပျော့ခြင်း၊ ပုံပျက်ခြင်များဖြစ်တတ်ပါတယ်။

တဖန် ဗီတာမင်ဒီက ကိုယ်ခံစွမ်းအားစနစ်မှာ  တစိပ်တပိုင်းပါဝင်လို့ ဗီတာမင်ဒီချို့တဲ့လျင် အသက်ရှူလမ်းကြောင်းပိုးဝင်ရောဂါပိုဖြစ်နိုင်တယ်၊ ဖြစ်လျင် ပိုဆိုးတယ်ဆိုပါတယ်။

တဖန် ဗီတာမင်ဒီက ခန္ဒာကိုယ်တစ်သျှူးတွေကိုမိမိကိုယ်ခံအားကပြန်တိုက်ခိုက်တဲ့ ရောဂါတွေကို လျော့ကျစေနိုင်သလို ကိုဗစ် ၁၉ ကြောင့်ဖြစ့်တဲ့ ကိုယ်ခံအားဖေါက်ပြန်မှု (ဆိုက်တိုကရိုင်းမုန်တိုင်း) ကိုလျှော့ချနိုင်တယ်လို့ယူဆကြပါတယ်၊

၄။  ဘယ်လိုလူတွေဗီတာမင်ဒီချို့တည့်သလဲ

(က) နေရောင်နဲ့ လုံလောက်အောင်ထိတွေ့မှုမရှိသူ ( အထူးသဖြင့်မြို့ပေါ်နေလူတန်းစား)

(ခ) အသားမည်းသူများ အရေပြားရှိ ရောင်ခြယ်ဆဲလ်တွေက ခရမ်းလွန်ရောင်ခြည်ကိုကာကွယ်ပေးတာကြောင့် အဲဒီရောင်ခြည်ကနေထုတ်တဲ့ဗီတာမင်ဒီလည်းအရနည်းသွားပါတယ်။

(ဂ) နို့စို့ကလေးငယ်များ ( အထူးသဖြင်မိခင်မှာဗီတာမင်ဒီ မလုံလောက်လျင်)

(ဃ) သက်ကြီးရွယ်အိုများ

(င) အစာမှ အဆီစုပ်ယူရန် ပြသနာရှိသူများ ( အူရောဂါ၊ အာဟာရစုပ်ယူမှု ပြသနာရောဂါ)။ ဗီတာမင်ဒီက အဆီမှာပျော်ဝင်ပြီး အူထဲမှာ အဆီကိုစုပ်ယူတဲ့အခါ သူ့ပါတခါတည်းစုပ်ယူရရှိတာကြောင့် အဆီကိုစုပ်ယူမှုလျော့ကျလျင် ဗီတာမင်ဒီစုပ်ယူမှုလည်းလျော့နည်းသွားလို့ အဆီစုပ်ယူမှုနည်းစေသောဆေး၊ အဆီကျဆေးသောက်နေသူများမှာ ဗီတာမင်ဒီ ချို့တဲ့နိုင်ပါတယ်။

 

၅။ ဗီတာမင်ဒီအများကြီးသောက်လျင် ဘေးဖြစ်နိုင်ပါသလား။

ဗီတာမင် အေ၊ ဒီ၊ အီး နဲ့ ကေ တိုက အဆီမှာပျော်ဝင်တဲ့သဘာဝရှိပြီး ခန္ဒာကိုယ်မှာပိုနေလည်း  ဆီးကနေစွန့်ပစ်လို့မရလို့ ဗီတာမင်အဆိပ်သင့်ခြင်းဖြစ်နိုင်ပါတယ်။

သွေးထဲမှာ ဗီတာမင်ဒီသရီး ကိုစစ်ဆေးလို့   125–150 nmol/L (50–60 ng/mL) ရှိလျင် ဗီတာမင်အဆိပ်သင့်သည်လို့ သတ်မှတ်သော်လည်း 75–120 nmol/L [30–48 ng/mL]) ရှိလျင်ပင် တချို့ကင်ဆာ၊ နှလုံးနဲ့ ဦးနှောက်သွေးကြောပြသနာ အရိုးကျိုးလွယ်ခြင်းစသည့်ဗီတာမင်ဲဒီ လွန်ကဲခြင်းပြသနာများကို ခံစားနိုင်ရတယ်လို့ဆိုထားပါတယ်။

အမေရိကန်အမျိူသားကျန်းမာရေး ဌာနမှထုတ်ပြန်ထားတဲ့ လူတယောက် တနေ့တာမှာ အများဆုံးစားသုံးနိုင်တဲ့ ဗီတာမင်ဒီပမာဏကို အောက်မှာဖေါ်ပြထားပါတယ်၊ အမေရိကန်တွေက မြန်မာတွေထက်လူကောင်ကြီးတာဖြစ်လို့ မြန်မာတွေကတော့ အောက်ကဇယားမှာပါတဲ့ပမာဏ၏ လေးပုံသုံးပုံ ထက်ပိုမစားသင့်ပါ။

ဗီတာမင်ဒီ အများဆုံးစားသုံးနိုင်တဲ့ ဗီတာမင်ဒီပမာဏကို

https://ods.od.nih.gov/factsheets/VitaminD-HealthProfessional/

လူတယောက် တနေ့တာမှာ အများဆုံးစားသုံးနိုင်တဲ့ ဗီတာမင်ဒီပမာဏ
အသက်	ကျား	မ	ကိုယ်ဝန်ဆောင်	နို့တိုက်မိခင်
မွေးစမှ ၆ လ	25 mcg (1,000 IU)	25 mcg (1,000 IU)
၇လ မှ ၁ နှစ်	38 mcg (1,500 IU)	38 mcg (1,500 IU)
၁- ၃ နှစ်	63 mcg (2,500 IU)	63 mcg (2,500 IU)
၄-၈ နှစ်	75 mcg (3,000 IU)	75 mcg (3,000 IU)
၉ - ၁၈ နှစ်	100 mcg (4,000 IU)	100 mcg (4,000 IU)	100 mcg (4,000 IU)	100 mcg (4,000 IU)
၁၉ နှစ်နှင့်အထက်	100 mcg (4,000 IU)	100 mcg (4,000 IU)	100 mcg (4,000 IU)	100 mcg (4,000 IU)

 

၆။ ကျနော်/ ကျမ ဗီတာမင်ဒီ ဖြည့်စွက်သောက်သင့်သလား။

နေရောင်ထဲအမြဲထွက်နေသူ နေရောင်အောင်မှာ အလုပ်လုပ်ကြသူများကတော့ ဗီတာမင်ဒီ ဖြည့်စွက်သောက်ရန်မလိုပါ။

အထက်မှာ ဖေါ်ပြထားသလို နေရောင်နဲ့ထိတွေ့မှု မလုံလောက်သူများနဲ့ ဗီတာမင်ဒီချို့တဲ့ နိုင်သူ စာရင်းဝင်သူများကတော့ ဗီတာမင်ဒီချို့တဲ့နိုင်လို့  ဖြည့်စွက်စာအဖြစ် သောက်လျင် အကျိုးရှိနိုင်ပါတယ်။

လွန်ကဲမှူမဖြစ်အောင်တော့ သတိထားရပါမယ်။

လူကြီးများအတွက်  ၄၀၀ ယူနစ်ကနေ ၁၀၀၀ ယူနစ်လောက်အထိပါတဲ့ ဗီတာမင်ဆေးလုံး(သို့) ဖြည့်စွက်စာက လုံလောက်တယ်လို့ ဆိုပါရစေ။

တခုသတိထားရမှာက တချို့လူကြီးတွေက သူများညွှန်းတဲ့ အားဆေးမျိုးစုံကို နေ့တိုင်းသောက်ပါတယ်၊

အားဆေးတချို့မှာ ဗီတာမင် ဒီ လုံလောက်အောင်ပါပါတယ်။ အဲလိုအားဆေးတနေ့တလုံးသောက်နေလျင် ဗီတာမင်ဒီ ချို့တဲ့မှုမဖြစ်နိုင်ပါတ၊ အဲလိုအားဆေးသောက်နေသူများ ဗီတာမင်ဒီ ဆေးတောင့်သီးသန့်မသောက်သင့်ပါ.

စာရှည်နေလို့ ကိုဗစ် 19 နဲ့ ဗီတာမင်ဒီ အကြောင်းကိုတော့ သီးသန့်ရေးထားပါတယ်။

 နမူနာဗီတာမင်ဒီဆေးပုလင်းတချို့နဲ့ ပါဝင်တဲ့ပမာဏကိုပြထားပါတယ်။ 

ယူနစ် ၂၀၀၀ ပါတဲ့ ဆေးတောင့်ကိုတော့ တရက်ခြား (သို့) နှစ်ရက်ခြားတစ်တောင့်သောက်လျင် လုံလောက်ပါတယ်။ 

တချို့ဆေးတောင့်တွေမှာ ဗီတာမင်ဒီ အား ယူနစ် ၅၀၀၀ အထိပါလို့ နေ့တိုင်းသောက်လျင် ဆိုးကျိုးဖြစ်နိုင်ပါတယ်။ တပတ်တလုံးသောက်လျင် လုံလောက်ပါတယ်။ 

အမျိုးသမီးများသောက်ဖို့ထုတ်တဲ့ Centrum Silver Women အားဆေးမှာ ဗီတာမင်ဒီ ယူနစ် ၁၀၀၀ ပါလို့ လူကြီးတယောက်အတွက်တနေ့တာလိုအပ်ချက် ပြည့်အောင်ပါပြီးဖြစ်ပါတယ်။ ဗီတာမင်ဒီဆေးလုံးထပ်သောက်ရန်မလိုပါ။ 

အသက် ၅၀ ကျော်သူများသောက်ဖို့ထုတ်တဲ့ Centrum Silver အားဆေးမှာ ဗီတာမင်ဒီ ယူနစ် ၆၀၀ ပါလို့ လူကြီးတယောက်အတွက်တနေ့တာလိုအပ်ချက် ပြည့်အောင်ပါပြီးဖြစ်ပါတယ်။

ဒေါက်တာအောင်

၀၅-၁၂-၂၀၂၀

https://b-wise-2b-healthy.blogspot.com/2020/12/blog-post.html

ကိုးကား

https://ods.od.nih.gov/factsheets/VitaminD-Consumer/

https://ods.od.nih.gov/factsheets/VitaminD-HealthProfessional/